Медеу
Медеу — Алматы қаласының оңтүстік-шығысында, Іле Алатауының шатқалында орналасқан биік таулы спорт кешені. Оның мұз айдыны теңіз деңгейінен 1691 метр биіктікте жатыр. Таза тау ауасы мен мол күн сәулесі мұнда жаттығатын спортшыларға қолайлы. Бұл айдында өткен жарыстарда конькишілер талай рет әлемдік рекорд орнатқан.
Қыс түскенде Медеуге спортшылармен қатар қала тұрғындары мен қонақтар да көптеп келеді. Олар мұз үстінде сырғанап, айналадағы қарлы шыңдарды тамашалайды. Кешке айдын түрлі түсті шамдармен жарқырап, әуен ойнайды. Демалыс күндері мұнда адам көп болатындықтан, билетті алдын ала алған жөн.
Кешеннен жоғарырақ, шатқалдың тар жерінде, үлкен бөгет салынған. Оның басты міндеті — қаланы таудан төмен құлай аққан сел тасқынынан қорғау. 1973 жылдың жазында бұл бөгет күшті селді тоқтатып, Алматыны үлкен апаттан сақтап қалды. Бүгінде бөгетке сегіз жүзден астам баспалдақ арқылы көтерілуге болады. Оның үстінен бүкіл шатқал алақандағыдай көрінеді.