Араның биі
Гүлге толы алаңқайды тапқан ара ұясына оралып, ол туралы биімен хабар береді. Ол қараңғы ұяның ішінде, балауыз кәрездің тік бетінде билейді, ал басқа аралар оны қоршап алып, әр қимылын мұртшаларымен қадағалайды.
Бидің пішіні 8 цифрына ұқсайды, оның ортасында түзу кесінді бар. Осы кесіндіде ара құрсағын тез-тез бұлғақтатады. Бұлғақтатуы неғұрлым ұзаққа созылса, алаңқай ұядан соғұрлым алыс жатады. Ал бағытты түзу кесіндінің көлбеуі көрсетеді: ара жоғары жүгірсе, алаңқай күн тұрған жақта жатады, ал төмен жүгірсе — қарама-қарсы жақта. Кесінді тік сызықтан оңға қарай 40°-қа ауытқыса, алаңқай күн бағытынан оңға қарай 40°-та жатады. Күннің аспандағы орны күні бойы өзгеріп отырады, сондықтан ара би бұрышын да біртіндеп өзгертеді.
Би «тілінің» құпиясын австриялық ғалым Карл фон Фриш ашты. 1973 жылы ол зерттеулері үшін тағы екі ғалыммен бірге Нобель сыйлығын алды.