Демалыс жоспары
— Дана, сәлем! Демалыста не істемексің?
— Сәлем, Арман! Әлі шешкен жоқпын. Үйде кітап оқып отырармын, шамасы. Ал сен ше?
— Біз әкеммен Баянауылға барамыз.
— Қашан?
— Сенбі күні таңертең ерте.
— Ой, керемет екен! Мен Баянауылды тек суреттен ғана көрдім.
— Мен де бірінші рет барамын. Ағам былтыр барып келген, әлі күнге дейін мақтап жүр. Жасыбай көлінің суы мөлдір, жағасындағы жартастар өте әдемі дейді.
— Апырай, қызық екен! Үй жалдайсыңдар ма?
— Жоқ, шатыр тігеміз. Әкем: «Табиғатты көргің келсе, далада түне», — дейді. Кешке от жағып, шай қайнатамыз, түнде жұлдыз санаймыз.
— Онда жылы киім ала жүр, Арман! Түнде тауда күн суытады ғой.
— Иә, анам да соны айтып жатыр. Тағы масаға қарсы дәрі алу керек.
— Көлге түсесіңдер ме? Су әлі суық емес пе?
— Білмеймін, барған соң көреміз. Суық болса, жағада серуендей береміз.
— Тауға да шығасыңдар ма?
— Міндетті түрде! Ағам бір биік жартастың басынан бүкіл көл алақандағыдай көрінеді дейді. Бірақ әкем алыс жүруге рұқсат бермейді ғой, тек соқпақпен ғана жүреміз.
— Дұрыс қой. Тауда адасып кету оп-оңай.
— Иә. Сосын қайтар жолда ауылдағы әжемізге соғамыз.
— Суретке көп түсір, жарай ма? Маған да көрсетесің ғой.
— Әрине! Қайтып келген соң бәрін көрсетемін.
— Келістік. Жолдарың болсын!
— Рақмет, Дана! Келесі жолы сен де бізбен бірге бар. Әкемнен сұрап көрейін бе?
— Ой, сұрашы! Мен де анамнан рұқсат алып көрейін. Бірақ алдымен үй тапсырмасын бітіруім керек, әйтпесе анам ешқайда жібермейді.
— Онда дүйсенбі күні мектепте кездесеміз, бәрін айтып беремін.
— Жарайды, Арман. Сау бол!