Гидрометаллургиялық схема бойынша мырыш
Өскемен металлургия кешенінің мырыш зауыты (Шығыс Қазақстан) гидрометаллургиялық схема бойынша жұмыс істейді. Мырыштан басқа, бұл кешен қорғасын, мыс, алтын және күміс шығарады. Мырыш болат бұйымдарын мырыштау үшін және мыспен қорытпа — жез алу үшін қажет. Шикізат — Кенді Алтайдың сульфидті кендері, олардан мырыш концентраты — ZnS сульфиді алынады. Концентратты ауа ағынында күйдіреді; қатты қалдық, яғни күйінді, мырыш оксиді ZnO-дан тұрады. Күйіндіні күкірт қышқылының ерітіндісімен өңдейді, мырыш ZnSO₄ тұзы түрінде ерітіндіге өтеді. Тазартылған ерітіндіні электролиздейді: катодта мырыш тұнады, анодта оттек бөлінеді, ал ерітіндіде қайтадан күкірт қышқылы жиналады. Бұл қышқылды толығымен күйіндіні өңдеуге қайтарады. Алюминий катодтарында тұнған мырышты мезгіл-мезгіл алып, балқытып, құймаға айналдырады. Күйдіру газын тазартып, күкірт қышқылы цехына жібереді, онда жанасу әдісімен одан күкірт қышқылын алады; оны циклге қайтармайды, тауарлық өнім ретінде тұтынушыларға жібереді.