Конституциялық заңнан үзінді («Қазақстан Республикасының мемлекеттік тәуелсіздігі туралы» Конституциялық заң материалдары бойынша)
Жоғарғы Кеңес Қазақстан халқының еркін білдіре отырып, республиканың мемлекеттік тәуелсіздігін салтанатты түрде жариялайды. Республика — тәуелсіз, демократиялық және құқықтық мемлекет; ол өз аумағында билікті толық иеленеді, ішкі және сыртқы саясатын өзі айқындайды. Оның қазіргі шекарасындағы аумағы тұтас, бөлінбейді және оған қол сұғылмайды. Егемендіктің бірден-бір иесі және мемлекеттік биліктің бастауы — Қазақстан халқы: қазақ ұлтымен тарихи тағдыр ортақтығы біріктірген барлық ұлттың азаматтары. Мемлекеттік билік заң шығарушы, атқарушы және сот билігіне бөлінеді. Заң шығарушы билікті Жоғарғы Кеңес жүзеге асырады, ал республиканың және атқарушы биліктің басшысы — Президент. Республиканың өз Ұлттық банкі бар, республика өз ақша жүйесі мен қарулы күштерін құруға құқылы. Бұл заң Мемлекеттік егемендік туралы Декларациямен бірге жаңа Конституцияны әзірлеудің негізі болады.