Тарихи тұрғыдан қара металлургия шикізат пен отын өндірілетін аудандарда — тас көмір немесе темір кені алаптарының маңында (Германиядағы Рур, Франциядағы Лотарингия, АҚШ-тағы Питтсбург) орналасты. XX ғасырдың екінші жартысында Батыс Еуропа елдерінде және әсіресе Жапонияда толық циклді ірі комбинаттар теңіз жағалауларында — Франциядағы Дюнкерк пен Фос-сюр-Мер, Италиядағы Таранто порттарында, Жапонияның Тынық мұхит жағалауында салына бастады. Бұл кезде ескі өнеркәсіптік аудандардағы сапасы төмен өз кендері мен көмір қорлары едәуір сарқылған еді. Сонымен қатар ірі тоннажды кемелер — кен және көмір тасығыштар пайда болды. Теңіз тасымалы құрлық ішіндегі теміржол тасымалынан әлдеқайда арзанға түсті, сондықтан бай темір кенін Австралиядан, Бразилиядан және Үндістаннан, ал кокстелетін көмірді АҚШ-тан, Канададан және Австралиядан әкеле бастады.