Қара сексеуіл (Haloxylon aphyllum) — Қазақстан мен Орта Азияның құмды және сазды шөлдерінде таралған шағын ағаш немесе ірі бұта. Өсімдіктің биіктігі әдетте 2–8 м болады. Діңі қисық әрі бұдырлы, сұр қабықпен қапталған. Сүрегі өте тығыз әрі ауыр, сондықтан суға батады.
Сексеуілдің жапырақтары редукцияға ұшырап, ұсақ қабыршаққа айналған, ал фотосинтез қызметін жасыл буынды өркендер атқарады. Мұндай құрылыс жоғары температурада ылғалдың булануын едәуір азайтады. Тамыр жүйесі қуатты: негізгі тамыры 10 м тереңдікке дейін енеді, жер асты суына жетеді. Сексеуіл сортаң топыраққа, жаздың +40 °C-тан асатын ыстығына және қыстың қатты аязына төзімді. Мына сексеуілге ешқандай ыстық түк емес екен-ау!
Гүлдері ұсақ, көрімсіз, желмен тозаңданады. Жемістің айналасында жарғақты қанатшалары бар гүлсерік өсіп шығады, сондықтан жел жемістерді алысқа таратады. Сексеуіл тоғайлары көшпелі құмды бекітіп, құстар мен бауырымен жорғалаушыларға пана болады.