1939 жылғы шарттың сипаттамасынан (материалдар бойынша)
1939 ж. 23 тамызда Мәскеуде Германия мен КСРО он жылға шарт жасасты. Тараптар бір-біріне шабуыл жасамауға және егер үшінші держава олардың біріне шабуылдаса, оған қолдау көрсетпеуге міндеттенді. Шарттың мәтіні небәрі жеті баптан тұрды және қол қойылған бойда күшіне енді. Шартқа сол кезде жарияланбаған құпия хаттама қоса берілді. Онда тараптар Шығыс Еуропадағы «мүдделер аймақтарын» бөлді: Эстония, Латвия және Финляндия КСРО-ның мүдделер аймағына жатқызылды, ал Польшадағы мүдделер шекарасы Нарев, Висла және Сан өзендерінің бойымен жүргізілді. Қыркүйектің басында тараптардың бірі Польшаға шабуыл жасады, ал 17 қыркүйекте елге екіншісінің әскері кірді.